[ad_1]
Last Updated:
ബെനിനെ എതിരില്ലാത്ത മൂന്ന് ഗോളുകൾക്ക് തകർത്ത് അർജന്റീന തങ്ങളുടെ നായകന് ഗംഭീര യാത്രയയപ്പ് നൽകി
അർജന്റീനയുടെ എക്കാലത്തെയും മഹാനായ സൂപ്പർ താരം ലയണൽ മെസ്സിയുടെ അർജന്റീന കുപ്പായത്തിലെ വിടവാങ്ങൽ മത്സരം വെറുമൊരു ഫുട്ബോൾ പോരാട്ടമായിരുന്നില്ല. അത് നീലയും വെള്ളയും അണിഞ്ഞ ഒരു ജനതയുടെ വികാരനിർഭരമായ ആദരവായിരുന്നു. ബ്യൂണസ് അയേഴ്സിലെ വിഖ്യാതമായ എസ്റ്റാഡിയോ മാസ മോനുമെന്റലിൽ നടന്ന അന്താരാഷ്ട്ര സൗഹൃദ മത്സരത്തിൽ ബെനിനെ എതിരില്ലാത്ത മൂന്ന് ഗോളുകൾക്ക് തകർത്ത് അർജന്റീന തങ്ങളുടെ നായകന് ഗംഭീര യാത്രയയപ്പ് നൽകി.
മത്സരം കാണാൻ ഗാലറിയിൽ പ്രമുഖ താരങ്ങളുടെ വൻനിര തന്നെയുണ്ടായിരുന്നു. അടുത്തിടെ അന്താരാഷ്ട്ര ഫുട്ബോളിൽ നിന്ന് വിരമിച്ച ആഞ്ചൽ ഡി മരിയ സഹതാരങ്ങൾക്ക് പിന്തുണയുമായി എത്തിയപ്പോൾ, ഫ്രഞ്ച് ലെജൻഡ് ഡേവിഡ് ട്രെസെഗെ മകൾക്കൊപ്പമാണ് മെസ്സിയുടെ വാം-അപ്പ് കാണാൻ എത്തിച്ചേർന്നത്.
മത്സരം ആരംഭിക്കുന്നതിന് മുൻപ് തന്നെ ആദരവുകൾക്ക് തുടക്കമായിരുന്നു. “ഗ്രാസിയാസ്” (നന്ദി) എന്ന് ആലേഖനം ചെയ്ത പത്താം നമ്പർ ജേഴ്സിയുടെ കൂറ്റൻ ബാനർ സ്റ്റേഡിയത്തിൽ ഉയർന്നു. തന്റെ മക്കളായ തിയാഗോ, മാറ്റിയോ, സിറോ എന്നിവരുടെ കൈപിടിച്ചാണ് മെസ്സി ഗ്രൗണ്ടിലേക്ക് കടന്നുവന്നത്.
ദേശീയ ഗാനം ആലപിച്ചപ്പോൾ വികാരഭരിതനായ മെസ്സിയുടെ കണ്ണുകൾ നിറഞ്ഞൊഴുകി. പരിശീലകൻ ലയണൽ സ്കലോണിയും സഹതാരം നിക്കോളാസ് ഒറ്റാമെൻഡിയും വിതുമ്പൽ അടക്കാൻ പാടുപെട്ടു. ടോസിന് മുൻപായി ബെനിൻ നായകൻ ആമസോണിയൻ ശൈലിയിലുള്ള ശില്പവും ഉപഹാരവും മെസ്സിക്ക് സമ്മാനിച്ചു.
മത്സരത്തിന്റെ തുടക്കം മുതൽ തനതു ശൈലിയിലായിരുന്നു മെസ്സിയുടെ നീക്കങ്ങൾ. ഏഴാം മിനിറ്റിൽ ബോക്സിന് പുറത്തുനിന്ന് മെസ്സി തൊടുത്ത മനോഹരമായ ഷോട്ട് ബെനിൻ ഗോൾകീപ്പർ തടഞ്ഞിട്ടു. പത്താം മിനിറ്റിൽ സ്റ്റേഡിയത്തിലുടനീളം കാണികളും കളിക്കാരും മെസ്സിക്കായി കൈയടിച്ച് ആദരമർപ്പിച്ചു.
ആദ്യ പകുതിയിൽ ഗോളുകളൊന്നും പിറന്നില്ലെങ്കിലും രണ്ടാം പകുതിയുടെ തുടക്കത്തിൽ തന്നെ അർജന്റീന ലീഡെടുത്തു. മെസ്സിയുടെ മനോഹരമായ ക്രോസിൽ നിന്ന് നിക്കോളാസ് ഒറ്റാമെൻഡി വലിയിലെത്തിച്ചു (1-0). തന്റെ അവസാന മത്സരം കളിക്കുകയായിരുന്ന ഒറ്റാമെൻഡി ഗോൾ നേടിയ ഉടൻ തന്നെ സബ്സ്റ്റിറ്റ്യൂട്ട് ചെയ്യപ്പെട്ടു. തൊട്ടുപിന്നാലെ യുവതാരം നികോ പാസ് ബോക്സിന് പുറത്തുനിന്ന് തൊടുത്ത മനോഹരമായ കർവിംഗ് ഷോട്ടിലൂടെ അർജന്റീനയുടെ രണ്ടാം ഗോൾ നേടി (2-0).
69-ാം മിനിറ്റിൽ അഗസ്റ്റിൻ എൻഡിയായെ ബോക്സിനുള്ളിൽ വീഴ്ത്തിയതിന് അർജന്റീനയ്ക്ക് അനുകൂലമായി പെനാൽറ്റി ലഭിച്ചു. അർജന്റീന താരങ്ങളെല്ലാം തങ്ങളുടെ ക്യാപ്റ്റനെ വളഞ്ഞ് ആഘോഷം തുടങ്ങി. പെനാൽറ്റിയെടുത്ത മെസ്സി പന്ത് പവർഫുൾ ഷോട്ടിലൂടെ ഗോൾകീപ്പർക്ക് യാതൊരു അവസരവും നൽകാതെ വലയുടെ മുകളിൽ വലതുമൂലയിലേക്ക് തറച്ചുകയറ്റി (3-0).
തൊട്ടുപിന്നാലെ നികോ ഗോൺസാലസിന്റെ ക്രോസിൽ നിന്ന് മറ്റൊരു ഗോൾ നേടാൻ അവസരം ലഭിച്ചെങ്കിലും മെസ്സിയുടെ വിക് ഫൂട്ട് ഷോട്ട് ലക്ഷ്യത്തിലെത്തിയില്ല. അവസാന നിമിഷങ്ങളിൽ മെസ്സി തൊടുത്ത മറ്റൊരു ഷോട്ട് ഗോൾകീപ്പറിൽ തട്ടി പോസ്റ്റിൽ തട്ടിത്തെറിച്ചു.
ഇഞ്ചുറി ടൈമിൽ ലഭിച്ച ഫ്രീക്കിക്ക് ക്രോസ് ബാറിന് മുകളിലൂടെ പറന്നതോടെ അവസാന നിമിഷത്തിലെ ഫ്രീക്കിക്ക് ഗോൾ എന്ന സ്വപ്നം ബാക്കിയായെങ്കിലും, മാസ് മോനുമെന്റൽ സ്റ്റേഡിയം ഒന്നടങ്കം “ഗ്രാസിയാസ് ലിയോ” എന്ന മുദ്രാവാക്യത്താൽ ഇരമ്പി. അങ്ങനെ രണ്ട് പതിറ്റാണ്ടോളം നീണ്ട ഐതിഹാസികമായ ഒരു അന്താരാഷ്ട്ര കരിയറിനാണ് അവിടെ തിരശ്ശീല വീണത്.
[ad_2]
Source link














