വലിയ പേരുകേട്ട ബൗളർമാരെ ഒട്ടും ഭയമില്ലാതെയാണ് വൈഭവ് നേരിടുന്നത്. ജസ്പ്രീത് ബുംറ, പാറ്റ് കമ്മിൻസ്, കാഗിസോ റബാഡ തുടങ്ങിയ പ്രമുഖ ബൗളർമാരെല്ലാം ഈ കൗമാരക്കാരന്റെ വെടിക്കെട്ട് ബാറ്റിംഗ് മികവ് ഇതിനോടകം നേരിട്ടറിഞ്ഞവരാണ്.

വൈഭവിന്റെ ഈ തകർപ്പൻ തുടക്കം കണ്ട് മുൻ ഇന്ത്യൻ വിക്കറ്റ് കീപ്പറും സെലക്ടറുമായിരുന്ന കിരൺ മോറെയ്ക്ക് ഓർമ്മ വരുന്നത് യുവതിലകമായിരുന്ന സച്ചിൻ ടെണ്ടുൽക്കറെയാണ്.

“ഇന്ത്യൻ ടീമിലേക്ക് ആദ്യമായി വരികയും മികച്ച ബൗളർമാർക്കെതിരെ ബാറ്റ് ചെയ്യുകയും ചെയ്ത സച്ചിൻ ടെണ്ടുൽക്കറെ ഞാൻ ആദ്യമായി കണ്ടപ്പോൾ തന്നെ അദ്ദേഹം ഒരു അപൂർവ്വ പ്രതിഭയാണെന്ന് എനിക്ക് മനസ്സിലായിരുന്നു. അതുപോലെ തന്നെയാണ് വൈഭവ് സൂര്യവംശിയും; അവൻ സവിശേഷമായ കഴിവുള്ളവനാണ്,” മോറെ വാർത്താ ഏജൻസിയായ എഎൻഐയോട് പറഞ്ഞു.

“ഇങ്ങനെയൊരു കളിക്കാരനെ നമുക്ക് ലഭിച്ചത് വലിയൊരു കാര്യമാണ്. അവൻ രാജ്യത്തിന് വലിയ കീർത്തി കൊണ്ടുവരും. അവൻ അവന്റെ ശൈലിയിൽ തന്നെ കളിക്കട്ടെ. ഈ കായികവിനോദത്തിനായി ദൈവം പ്രത്യേകം സൃഷ്ടിച്ച് ഒരുക്കിയെടുത്തവനാണ് അവൻ,” അദ്ദേഹം കൂട്ടിച്ചേർത്തു.

നിലവിൽ രാജസ്ഥാൻ റോയൽസിന്റെ ഏറ്റവും കൂടുതൽ റൺസ് നേടിയ കളിക്കാരനായ വൈഭവ്, ടൂർണമെന്റിൽ മൊത്തത്തിൽ മൂന്നാം സ്ഥാനത്താണ്. 13 ഇന്നിംഗ്സുകളിൽ നിന്ന് 44.53 ശരാശരിയിലും 236.32 സ്ട്രൈക്ക് റേറ്റിലും ഒരു സെഞ്ചുറിയും മൂന്ന് അർധസെഞ്ചുറികളും ഉൾപ്പെടെ 579 റൺസ് താരം നേടിയിട്ടുണ്ട്. ഒരു ഐപിഎൽ സീസണിൽ ഒരു ഇന്ത്യൻ താരം നേടുന്ന ഏറ്റവും കൂടുതൽ സിക്സറുകൾ (53 സിക്സറുകൾ) എന്ന റെക്കോർഡും വൈഭവ് സ്വന്തമാക്കി.

ടി20 ഫോർമാറ്റുമായി വളരെ വേഗം പൊരുത്തപ്പെട്ട സൂര്യവംശി 31 മത്സരങ്ങളിൽ നിന്ന് 42.66 ശരാശരിയിലും 217.68 സ്ട്രൈക്ക് റേറ്റിലും നാല് സെഞ്ചുറികളും നാല് അർധസെഞ്ചുറികളും ഉൾപ്പെടെ 1,280 റൺസ് നേടിയിട്ടുണ്ട്. 144 റൺസാണ് ഉയർന്ന സ്കോർ.

ലിസ്റ്റ് എ ക്രിക്കറ്റിൽ എട്ട് ഇന്നിംഗ്സുകളിൽ നിന്ന് 44.12 ശരാശരിയിലും 164.95 സ്ട്രൈക്ക് റേറ്റിലും ഒരു സെഞ്ചുറിയും ഒരു അർധസെഞ്ചുറിയും ഉൾപ്പെടെ 353 റൺസ് നേടി. 190 റൺസാണ് ഇതിലെ മികച്ച സ്കോർ.

2026ലെ ഐസിസി അണ്ടർ-19 ക്രിക്കറ്റ് ലോകകപ്പിൽ ഏഴ് മത്സരങ്ങളിൽ നിന്ന് 62.71 ശരാശരിയിലും 169.49 സ്ട്രൈക്ക് റേറ്റിലും ഒരു സെഞ്ചുറിയും മൂന്ന് അർധസെഞ്ചുറികളും ഉൾപ്പെടെ 439 റൺസ് നേടി വൈഭവ് രണ്ടാമത്തെ ഉയർന്ന റൺവേട്ടക്കാരനായി മാറി. ഈ ടൂർണമെന്റിൽ 30 സിക്സറുകൾ അടിച്ചുകൂട്ടി, 2022 പതിപ്പിൽ ദക്ഷിണാഫ്രിക്കയുടെ ഡെവാൾഡ് ബ്രെവിസ് സ്ഥാപിച്ച 18 സിക്സറുകളുടെ റെക്കോർഡ് വലിയ മാർജിനിൽ വൈഭവ് തകർത്തു. അണ്ടർ-19 ലോകകപ്പ് ചരിത്രത്തിൽ ഏറ്റവും കൂടുതൽ സിക്സറുകൾ നേടിയ റെക്കോർഡും ഇപ്പോൾ ഈ താരം സ്വന്തമാക്കിയിരിക്കുകയാണ്.

കൂടാതെ, അണ്ടർ-19 ഏകദിനങ്ങളിൽ ‌ഇന്ത്യക്കായി ഏറ്റവും കൂടുതൽ റൺസ് നേടിയ താരവും വൈഭവാണ്. 25 ഇന്നിംഗ്സുകളിൽ നിന്ന് 56.48 ശരാശരിയിലും 165-ന് മുകളിൽ സ്ട്രൈക്ക് റേറ്റിലും നാല് സെഞ്ചുറികളും ഏഴ് അർദ്ധസെഞ്ചുറികളും ഉൾപ്പെടെ 1,412 റൺസ് താരം അടിച്ചുകൂട്ടി. 175 റൺസാണ് ഉയർന്ന സ്കോർ. അതേസമയം, റെഡ് ബോൾ (ഫസ്റ്റ് ക്ലാസ്) ക്രിക്കറ്റിൽ എട്ട് മത്സരങ്ങളിലെ 12 ഇന്നിംഗ്സുകളിൽ നിന്നായി ഒരു അർധസെഞ്ചുറി ഉൾപ്പെടെ 17.25 ശരാശരിയിൽ 207 റൺസാണ് താരം നേടിയിട്ടുള്ളത്.