വനിതകളുടെ ട്രഡീഷണൽ -60 കിലോഗ്രാം വിഭാഗത്തിൽ വെങ്കല മെഡൽ നേടിയ സുചിക തരിയാൽ, മിക്സഡ് മാർഷ്യൽ ആർട്സിൽ ഏഷ്യൻ ഗെയിംസ് മെഡൽ നേടുന്ന ആദ്യ ഇന്ത്യൻ താരമായി ചരിത്രം കുറിച്ചു.

“ഇന്ത്യയ്ക്ക് ചരിത്രപരമായ നേട്ടം! മിക്സഡ് മാർഷ്യൽ ആർട്സിൽ വെങ്കല മെഡൽ നേടി ഈ രംഗത്ത് ഇന്ത്യയുടെ ആദ്യ ഏഷ്യൻ ഗെയിംസ് മെഡൽ ഉറപ്പിച്ച സുചിക തരി യാലിന് അഭിനന്ദനങ്ങൾ. അവരുടെ അർപ്പണബോധവും ആവേശവും എടുത്തുപറയേണ്ടതാണ്. ഭാവിയിൽ കൂടുതൽ വിജയങ്ങൾ ഉണ്ടാകട്ടെ എന്ന് ആശംസിക്കുന്നു: പ്രധാനമന്ത്രി @narendramodi,” എന്ന് പ്രധാനമന്ത്രിയുടെ ഓഫീസ് ചൊവ്വാഴ്ച എക്സിൽ കുറിച്ചു.

ഏഷ്യൻ ഗെയിംസിൽ ഹർമാൻപ്രീത് കൗറിന്റെ നേതൃത്വത്തിലുള്ള വനിതാ ക്രിക്കറ്റ് ടീം സ്വർണ മെഡൽ നേടിയതിനെയും പ്രധാനമന്ത്രി മോദി അഭിനന്ദിച്ചു.

“ഇന്ത്യൻ ക്രിക്കറ്റിന്റെ അതിമഹത്തായ വിജയം! ഏഷ്യൻ ഗെയിംസിൽ സ്വർണ മെഡൽ നേടിയ നമ്മുടെ വനിതാ ക്രിക്കറ്റ് ടീമിന് ഹൃദയപൂർവം അഭിനന്ദനങ്ങൾ. ആത്മവിശ്വാസവും മിടുക്കും മികച്ച ടീം വർക്കും പ്രകടമാക്കിയ മത്സരമായിരുന്നു അത്. ഈ ഗെയിംസിലെ ഇന്ത്യയുടെ ആദ്യ സ്വർണ മെഡൽ കൂടിയാണിത്. ടീം രാജ്യത്തിന് അഭിമാനമായി മാറിയിരിക്കുന്നു, ഒപ്പം രാജ്യത്തുടനീളമുള്ള കായികപ്രേമികൾക്ക് ഇത് പ്രചോദനമാകും. മുഴുവൻ ടീമിനും ആശംസകൾ”

വനിതാ ക്രിക്കറ്റ് ടീമിന്റെ സ്വർണം ഈ ഗെയിംസിലെ ഇന്ത്യയുടെ ആദ്യ സ്വർണനേട്ടമായപ്പോൾ, തരിയാലിന്റെ വെങ്കലം കോണ്ടിനെന്റൽ മൾട്ടി-സ്പോർട്സ് ഇവന്റിൽ ഇന്ത്യയെ സംബന്ധിച്ച് എംഎംഎ രംഗത്തെ ചരിത്രപരമായ ഒരു നിമിഷമായി മാറി.

ദേശീയ തലത്തിലുള്ള മുൻ ജൂഡോ താരമായ തരിയാൽ, ക്വാർട്ടർ ഫൈനലിൽ മംഗോളിയയുടെ അൽതാൻചിമെഗ് ബൈഗൽമായെ 2-0 എന്ന സ്കോറിന് പരാജയപ്പെടുത്തിയാണ് മെഡൽ ഉറപ്പിച്ചത്.

മറുവശത്ത്, മുൻ എഡിഷനിലെ വനിതാ ക്രിക്കറ്റ് ഫൈനലിന്റെ ആവർത്തനത്തിൽ ശ്രീലങ്കയെ പരാജയപ്പെടുത്തി കിരീടം നിലനിർത്തിയ ഇന്ത്യൻ വനിതാ ക്രിക്കറ്റ് ടീം ഈ ഏഷ്യൻ ഗെയിംസിലെ ആദ്യ സ്വർണമെഡലും രാജ്യത്തിന് സമ്മാനിച്ചു.