ആദ്യഘട്ടത്തിൽ ബെംഗളൂരു, മുംബൈ, ഗുവാഹത്തി, ന്യൂ ചണ്ഡീഗഡ്, ലഖ്നൗ, കൊൽക്കത്ത, ചെന്നൈ, ഡൽഹി, അഹമ്മദാബാദ്, ഹൈദരാബാദ് എന്നിങ്ങനെ പത്ത് നഗരങ്ങളിലായി ആകെ 20 മത്സരങ്ങളാണ് നടക്കുക. ഈ ഘട്ടത്തിൽ നാല് ഡബിൾ ഹെഡറുകൾ (ഒരു ദിവസം രണ്ട് മത്സരങ്ങൾ) ഉണ്ടായിരിക്കും. ഉച്ചകഴിഞ്ഞ് 3:30-നും വൈകിട്ട് 7:30-നുമാണ് മത്സരങ്ങൾ. ഉദ്ഘാടന മത്സരത്തിന് പിന്നാലെ ഞായറാഴ്ച മുംബൈയിലെ വാങ്കഡെ സ്റ്റേഡിയത്തിൽ മുംബൈ ഇന്ത്യൻസ് കൊൽക്കത്ത നൈറ്റ് റൈഡേഴ്സിനെ നേരിടും.

സീസണിലെ ആദ്യ ഡബിൾ ഹെഡർ 2026 ഏപ്രിൽ 4-നാണ് നിശ്ചയിച്ചിരിക്കുന്നത്. അന്ന് ഉച്ചയ്ക്ക് ഡൽഹിയിലെ അരുൺ ജെയ്റ്റ്‌ലി സ്റ്റേഡിയത്തിൽ ഡൽഹി ക്യാപിറ്റൽസ് മുംബൈ ഇന്ത്യൻസിനെയും, വൈകുന്നേരം അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ ഗുജറാത്ത് ടൈറ്റൻസ് രാജസ്ഥാൻ റോയൽസിനെയും നേരിടും. രാജസ്ഥാൻ റോയൽസ് തങ്ങളുടെ ഹോം മത്സരങ്ങൾക്ക് ഗുവാഹത്തിയിൽ തുടക്കം കുറിക്കും. ചെന്നൈ സൂപ്പർ കിംഗ്‌സ്, മുംബൈ ഇന്ത്യൻസ് എന്നിവർക്കെതിരെയുള്ള മത്സരങ്ങൾ ഇവിടെയായിരിക്കും നടക്കുക. പഞ്ചാബ് കിംഗ്‌സ് അവരുടെ ആദ്യ ഹോം മത്സരങ്ങൾ ന്യൂ ചണ്ഡീഗഡിലെ പിസിഎ സ്റ്റേഡിയത്തിൽ കളിക്കും.

ഈ സീസണിൽ റോയൽ ചലഞ്ചേഴ്സ് ബെംഗളൂരു അഞ്ച് ഹോം മത്സരങ്ങൾ ബെംഗളൂരുവിലും രണ്ട് മത്സരങ്ങൾ റായ്പൂരിലും കളിക്കും. പഞ്ചാബ് കിംഗ്‌സ് നാല് മത്സരങ്ങൾ ന്യൂ ചണ്ഡീഗഡിലും മൂന്ന് മത്സരങ്ങൾ ധർമ്മശാലയിലും കളിക്കുമ്പോൾ, രാജസ്ഥാൻ റോയൽസ് മൂന്ന് ഹോം മത്സരങ്ങൾ ഗുവാഹത്തിയിലും നാലെണ്ണം ജയ്പൂരിലുമാണ് സംഘടിപ്പിക്കുക.

ഐപിഎൽ ആദ്യഘട്ട മത്സരക്രമം

ബെംഗളൂരുവിലെ മത്സരങ്ങൾ കർണാടക സർക്കാർ രൂപീകരിച്ച വിദഗ്ധ സമിതിയുടെ അനുമതിക്ക് വിധേയമായിരിക്കും. സ്റ്റേഡിയത്തിന്റെ ഒരുക്കങ്ങൾ വിലയിരുത്തുന്നതിനായി സമിതി മാർച്ച് 13-ന് ചിന്നസ്വാമി സ്റ്റേഡിയത്തിൽ പരിശോധന നടത്തുകയും മോക്ക് ഡെമോൺസ്‌ട്രേഷൻ സംഘടിപ്പിക്കുകയും ചെയ്യും. അസം, പശ്ചിമ ബംഗാൾ, തമിഴ്നാട്, കേരളം എന്നീ സംസ്ഥാനങ്ങളിൽ നിയമസഭാ തിരഞ്ഞെടുപ്പ് നടക്കാനിരിക്കുന്നതിനാൽ രണ്ട് ഘട്ടങ്ങളിലായാണ് ഷെഡ്യൂൾ പ്രഖ്യാപിക്കുന്നത്. രണ്ടാം ഘട്ടം ഉൾപ്പെടെയുള്ള പൂർണ്ണമായ ഷെഡ്യൂൾ പിന്നീട് അറിയിക്കും. ടൂർണമെന്റിന്റെ ഫൈനൽ മെയ് 31-ന് നടക്കും.