ചരിത്രനേട്ടം: ജപ്പാനിലെ നഗോവയിൽ നടന്ന വനിതകളുടെ റോഡ് റേസ് മത്സരത്തിലാണ് ഫരിബ ഹാഷിമി വെള്ളിമെഡൽ സ്വന്തമാക്കിയത്. 2002ന് ശേഷം ഏഷ്യൻ ഗെയിംസിൽ മെഡൽ നേടുന്ന ആദ്യ അഫ്ഗാൻ വനിതാ താരമാണ് ഇവർ.

അഫ്ഗാനിലെ ദുരിതജീവിതം: അഫ്ഗാനിസ്ഥാനിലെ ഫര്യാംബ് പ്രവിശ്യയിൽ ജനിച്ച ഫരിബ, 2021-ൽ താലിബാൻ കാബൂൾ പിടിച്ചെടുത്തതിനെ തുടർന്ന് നാടുവിട്ട് ഇറ്റലിയിൽ അഭയം പ്രാപിക്കുകയായിരുന്നു. ഭരണമാറ്റത്തിന് ശേഷം 24 ലക്ഷം അഫ്ഗാൻ പെൺകുട്ടികൾ സെക്കൻഡറി വിദ്യാഭ്യാസത്തിൽ നിന്ന് പുറത്താക്കപ്പെട്ടതായി യുനെസ്കോ കണക്കാക്കുന്നു.

പുരുഷവേഷം കെട്ടിയുള്ള പരിശീലനം: അഫ്ഗാനിൽ സ്ത്രീകൾക്ക് കായികരംഗത്ത് ഏർപ്പെടുത്തിയിരുന്ന കർശന വിലക്കുകൾ കാരണം പുരുഷവേഷം ധരിച്ചും മുഖം മൂടിയുമാണ് ഫരിബ പരിശീലനം നടത്തിയിരുന്നത്. പരിശീലനത്തിനിടയിൽ ആളുകളുടെ കല്ലേറുകളും ആക്രമണങ്ങളും നേരിടേണ്ടി വന്നിട്ടുണ്ടെന്ന് താരം വെളിപ്പെടുത്തി.

അഫ്ഗാൻ വനിതകൾക്കായുള്ള പോരാട്ടം: “ഈ വെള്ളിമെഡൽ അഫ്ഗാൻ സ്ത്രീകളുടെ കടുത്ത ഇച്ഛാശക്തിയെയാണ് കാണിക്കുന്നത്. ഞാൻ ഒറ്റയ്ക്കല്ല, എന്റെ പിന്നിൽ ദശലക്ഷക്കണക്കിന് സ്ത്രീകളുണ്ട്,” വിജയാഘോഷവേളയിൽ ഫരിബ പറഞ്ഞു. 2024 പാരിസ് ഒളിമ്പിക്സിലും ഫരിബയും സഹോദരി യുൽദുസും മത്സരിച്ചിരുന്നു.

ഹാഷിമി 15-ആം വയസ്സിൽ തന്റെ സഹോദരിയായ യുൽദൂസിന്റെ പാത പിന്തുടർന്നാണ് സൈക്ലിംഗിലേക്ക് കടന്നത്. യുൽദൂസും ഒരു അന്താരാഷ്ട്ര സൈക്ലിസ്റ്റായിരുന്നു. എന്നാൽ ഫര്യാബ് പ്രവിശ്യയിലെ അവരുടെ സ്വദേശത്ത് ഈ കായികരംഗത്തിലേക്കുള്ള യാത്ര അപകടങ്ങളാൽ നിറഞ്ഞതായിരുന്നു.

“പരിശീലനത്തിന് പോകുമ്പോഴെല്ലാം ഞാൻ പുരുഷവേഷം ധരിക്കുമായിരുന്നു. ആളുകൾ എന്നെ തിരിച്ചറിയാതിരിക്കാനോ ആക്രമിക്കാതിരിക്കാനോ രണ്ടോ മൂന്നോ വ്യത്യസ്ത മാസ്കുകൾ വരെ ധരിക്കുമായിരുന്നു,” ഞായറാഴ്ച നടന്ന ട്രയലിന് ശേഷം അവർ വാർത്താ ഏജൻസിയോട് പറഞ്ഞിരുന്നു.

“അവർ എന്നെ കണ്ടെത്തുമോ എന്ന ഭയം എപ്പോഴും ഉണ്ടായിരുന്നു. പലപ്പോഴും വലിയ കല്ലുകൾ എന്റെ തലയിലേക്ക് എറിഞ്ഞിട്ടുണ്ട്. ആളുകൾ കുപ്പികളും എറിഞ്ഞിട്ടുണ്ട്. ആക്രമണങ്ങളിലൂടെയും ആക്രമണ സ്വഭാവത്തിലൂടെയും ഞങ്ങളെ വീട്ടിലേക്ക് മടക്കിയയക്കാൻ അവർ ശ്രമിച്ചു. ഞാൻ വളരെ കഷ്ടപ്പെട്ട ഒരു കാലഘട്ടം നേരിട്ടു. എന്നാൽ എന്റെ ജനങ്ങൾ മോശക്കാരാണെന്ന് ഞാൻ പറയുന്നില്ല. നമ്മുടെ രാജ്യം അതിമനോഹരമാണ്. പക്ഷേ അവിടുത്തെ മനോഭാവം വ്യത്യസ്തമാണ്.”

“എന്റെ രാജ്യത്ത് ജീവിക്കാൻ കഴിയാത്തത് ദുഃഖകരമാണ്,” ഹാഷിമി പറഞ്ഞു. “എന്റെ കുടുംബത്തെ കണ്ടിട്ട് വളരെ നാളുകളായി. എന്റെ സ്വപ്നത്തെ പിന്തുടരാനായി ഞാൻ എന്റെ രാജ്യത്ത് നിന്ന് രക്ഷപ്പെട്ടു. ആളുകൾ എറിഞ്ഞ കല്ലുകളിൽ നിന്ന് രക്ഷപ്പെടാനാണ് ഞാൻ അവിടെ നിന്ന് ഓടിപ്പോയത്.”

“ഭാവിയിൽ എന്റെ രാജ്യത്തിനുള്ളിൽ ചില മാറ്റങ്ങൾ കൊണ്ടുവരാൻ എനിക്ക് സാധിക്കുമെന്ന് ഞാൻ പ്രതീക്ഷിക്കുന്നു. തിരിച്ചെത്തി എന്റെ ജനങ്ങൾക്ക് പ്രചോദനമാകുക എന്നതാണ് എന്റെ ഏറ്റവും വലിയ സ്വപ്നം.” – ഫരിബ ഹാഷിമി പറഞ്ഞു.