ഞായറാഴ്ച (മാർച്ച് 22) നടന്ന വാർത്താ സമ്മേളനത്തിൽ സംസാരിക്കവെ, രണ്ടോ മൂന്നോ താരങ്ങൾ ഇത്തരത്തിൽ പോയിട്ടുണ്ടെന്നും അവർക്കെതിരെ നിയമനടപടികൾ സ്വീകരിച്ചുവരികയാണെന്നും നഖ്‌വി വ്യക്തമാക്കി. കഴിഞ്ഞ വർഷം പെഷവാർ സാൽമിയുമായുള്ള കരാർ ലംഘിച്ച് മുംബൈ ഇന്ത്യൻസിൽ ചേർന്ന ദക്ഷിണാഫ്രിക്കൻ താരം കോർബിൻ ബോഷിനെ പിസിബി ഒരു വർഷത്തേക്ക് വിലക്കിയിരുന്നു. ലോകത്തിലെ മുൻനിര താരങ്ങൾ ഐപിഎല്ലിലെ ഉയർന്ന പ്രതിഫലം കാരണം അവിടേക്ക് പോകാൻ താല്പര്യപ്പെടുമ്പോഴും, പിഎസ്എല്ലിന്റെ ആകർഷണീയത കുറഞ്ഞിട്ടില്ലെന്നും മുൻപ് വരാതിരുന്ന പല പ്രമുഖ താരങ്ങളും ഇപ്പോൾ പാകിസ്ഥാനിലേക്ക് എത്തുന്നുണ്ടെന്നും അദ്ദേഹം അവകാശപ്പെട്ടു.

ഐപിഎല്ലുമായി നേരിട്ട് ഏറ്റുമുട്ടുന്ന രീതിയിലാണ് പിഎസ്എൽ ഷെഡ്യൂൾ ചെയ്തിരിക്കുന്നതെങ്കിലും, അത് ടൂർണമെന്റിനെ ബാധിക്കില്ലെന്ന് നഖ്‌വി പറഞ്ഞു. ഐപിഎല്ലിലേക്ക് താരങ്ങൾ പോകുന്നുണ്ടെങ്കിൽ പകരം മികച്ച മറ്റ് താരങ്ങൾ ഇങ്ങോട്ടും വരുന്നുണ്ടെന്നാണ് അദ്ദേഹത്തിന്റെ വാദം. കരാർ ലംഘിക്കുന്നവർക്കെതിരെ നിയമപരമായ കർശന നടപടികൾ തുടരുമെന്നും അദ്ദേഹം കൂട്ടിച്ചേർത്തു. ഇത്തവണത്തെ പിഎസ്എൽ ലാഹോർ, കറാച്ചി എന്നീ രണ്ട് നഗരങ്ങളിൽ മാത്രമായി പരിമിതപ്പെടുത്തിയതായും ആദ്യ കുറച്ച് മത്സരങ്ങളിൽ കാണികൾക്ക് പ്രവേശനമുണ്ടാകില്ലെന്നും അദ്ദേഹം വാർത്താ സമ്മേളനത്തിൽ പറഞ്ഞു.