“ഇന്ത്യൻ വനിതാ ക്രിക്കറ്റ് ടീമിന്റെ ക്യാപ്റ്റനായി സ്മൃതി മന്ദാനയെ നിയമിച്ചതായി ബിസിസിഐ പ്രഖ്യാപിക്കുന്നു,” എന്ന് ബിസിസിഐ പ്രസ്താവനയിൽ വ്യക്തമാക്കി.

“കഴിഞ്ഞ കാലങ്ങളിൽ ഇന്ത്യൻ വനിതാ ക്രിക്കറ്റിലെ മുൻനിര താരങ്ങളിൽ ഒരാളായിരുന്ന സ്മൃതി, എല്ലാ ഫോർമാറ്റുകളിലെയും ടീമിന്റെ പുരോഗതിയിൽ നിർണായക പങ്കുവഹിച്ചിട്ടുണ്ട്. പരിചയസമ്പന്നയായ ഒരു അന്താരാഷ്ട്ര ക്രിക്കറ്റ് താരം കൂടിയായ അവർ ആഭ്യന്തര, ഫ്രാഞ്ചൈസി ക്രിക്കറ്റിലും തന്റെ നേതൃഗുണം തെളിയിച്ചിട്ടുണ്ട്. ഏറ്റവും ഒടുവിൽ 2024-ലും 2026-ലും വനിതാ പ്രീമിയർ ലീഗ് കിരീടങ്ങളിലേക്ക് റോയൽ ചലഞ്ചേഴ്സ് ബെംഗളൂരുവിനെ അവർ നയിച്ചു.”

“2013 മുതൽ ഇന്ത്യൻ ടീമിന്റെ ഭാഗമായ സ്മൃതി, വലിയ അനുഭവസമ്പത്തുമായാണ് ഈ ഉത്തരവാദിത്തത്തിലേക്ക് എത്തുന്നത്. ടീം ഒരു പുതിയ ഘട്ടത്തിലേക്ക് കടക്കുമ്പോൾ അവർ ടീമിനെ നയിക്കുന്നതിന്റെ ചുമതലയേൽക്കും. ഇനി മുതൽ വൈറ്റ് ബോൾ ക്രിക്കറ്റിന്റെ മുഴുവൻ സമയ ക്യാപ്റ്റനായിരിക്കുമെങ്കിലും, സ്മൃതി ഇതിനകം 18 ടി20 മത്സരങ്ങളിലും നാല് ഏകദിനങ്ങളിലും ഇന്ത്യയെ നയിച്ചിട്ടുണ്ട്,” പ്രസ്താവനയിൽ കൂട്ടിച്ചേർത്തു.

ഇന്ത്യൻ ടീമിന്റെ പുതിയ ക്യാപ്റ്റനായുള്ള തന്റെ നിയമനത്തെക്കുറിച്ച് സംസാരിച്ച സ്മൃതി മന്ദാന, ഇന്ത്യയെ നയിക്കാനുള്ള ഉത്തരവാദിത്തം ലഭിച്ചത് തനിക്ക് ലഭിച്ച വലിയൊരു അംഗീകാരമാണെന്ന് പറഞ്ഞു.

“ഇന്ത്യയെ നയിക്കാനുള്ള ഉത്തരവാദിത്തം ലഭിക്കുന്നത് വളരെ വിശേഷപ്പെട്ട ഒരു ബഹുമതിയാണ്. ഇന്ത്യയെ പ്രതിനിധീകരിക്കുക എന്നത് എനിക്ക് എപ്പോഴും വലിയൊരു കാര്യമാണ്, ഇപ്പോൾ ടീമിനെ നയിക്കാനുള്ള അവസരം ലഭിച്ചിരിക്കുന്നത് ഞാൻ അങ്ങേയറ്റം വിലമതിക്കുന്നു. ബിസിസിഐയ്ക്കും, സെലക്ടർമാർക്കും, സഹതാരങ്ങൾക്കും, എന്റെ യാത്രയിലുടനീളം എന്നെ പിന്തുണച്ച എല്ലാവർക്കും, എന്റെമേൽ വിശ്വാസമർപ്പിച്ചതിനു ഞാൻ നന്ദി പറയുന്നു,” സ്മൃതി പറഞ്ഞു.

“വർഷങ്ങളായി ക്യാപ്റ്റൻ എന്ന നിലയിൽ ഹർമൻപ്രീത് നൽകിയ സംഭാവനകളെയും ഞാൻ അഭിനന്ദിക്കാൻ ആഗ്രഹിക്കുന്നു. വലിയ ആത്മസമർപ്പണത്തോടെയാണ് അവർ ടീമിനെ നയിച്ചത്. ഈ പദവിയോടൊപ്പം വരുന്ന ഉത്തരവാദിത്തം ഞാൻ മനസ്സിലാക്കുന്നു. ടീമിനൊപ്പം പ്രവർത്തിക്കാനും, ഒപ്പം പഠിക്കാനും, ഇന്ത്യൻ ക്രിക്കറ്റിനെ മുന്നോട്ട് നയിക്കാൻ എന്റെ പരമാവധി നൽകാനും ഞാൻ ആഗ്രഹിക്കുന്നു,” അവർ കൂട്ടിച്ചേർത്തു.