അടുത്തിടെയായി ഇന്ത്യൻ താരങ്ങൾ നേരിടുന്ന തുടർച്ചയായ പരിക്കുകളും ഫിറ്റ്‌നസ് പ്രശ്‌നങ്ങളും ടീമിനെ വലിയ തോതിൽ ബാധിച്ചിട്ടുണ്ട്. പ്രമുഖ പേസർ ജസ്പ്രീത് ബുംറയാണ് ഇതിൽ ഏറ്റവും ഒടുവിലായി പരിക്കിന്റെ പിടിയിലായത്.

പരിക്കിനെ തുടർന്ന് ഹർഷിത് റാണ, നിതീഷ് കുമാർ റെഡ്ഡി എന്നിവരെയും ടീം തിരഞ്ഞെടുപ്പിൽ നിന്ന് ഒഴിവാക്കിയിരുന്നു. അതേസമയം, വാഷിംഗ്ടൺ സുന്ദറിന് ഒന്നാം ടെസ്റ്റ് നഷ്ടമാവുകയും രണ്ടാം ടെസ്റ്റിലെ പങ്കാളിത്തം അനിശ്ചിതത്വത്തിലാവുകയും ചെയ്തിട്ടുണ്ട്.

ബിസിസിഐയുടെ ‘സെന്റർ ഓഫ് എക്സലൻസിൽ’ (CoE) നിന്നുള്ള ഫിറ്റ്‌നസ് ക്ലിയറൻസിന് വിധേയമായി സായ് സുദർശനെയും സ്ക്വാഡിൽ ഉൾപ്പെടുത്തിയിട്ടുണ്ട്. ഇന്ത്യയുടെ സമീപകാല ഇംഗ്ലണ്ട് പര്യടനത്തിനിടെ ടീമിലെ തുടർച്ചയായ പരിക്കുകളെക്കുറിച്ചും താരങ്ങളുടെ ഫിറ്റ്‌നസ് തകർച്ചയെക്കുറിച്ചും ക്യാപ്റ്റൻ ശുഭ്മൻ ഗില്ലും ഹെഡ് കോച്ച് ഗൗതം ഗംഭീറും കടുത്ത അതൃപ്തി പ്രകടിപ്പിച്ചിരുന്നു.

താരങ്ങളുടെ തിരിച്ചുവരവിനായി പ്രവർത്തിക്കുന്ന ബിസിസിഐയുടെ സെന്റർ ഓഫ് എക്സലൻസും ഹെഡ് ഫിസിയോ കമലേഷ് ജെയിനും ഇപ്പോൾ കടുത്ത വിമർശനങ്ങൾ നേരിടുകയാണ്. പ്രമുഖ മുതിർന്ന കളിക്കാർ ബി‌സിസിഐ സംവിധാനത്തിന് പുറത്തുള്ള വിദഗ്ധരുടെ ഉപദേശം തേടിയതായും റിപ്പോർട്ടുകളുണ്ട്. കൂടാതെ, മുൻ സ്ട്രെങ്ത് ആൻഡ് കണ്ടീഷനിംഗ് കോച്ച് സോഹം ദേശായിക്ക് പകരം അഡ്രിയാൻ ലെ റൂ വന്നതുമായുള്ള മാറ്റം പ്രതീക്ഷിച്ചത്ര സുഗമമായിരുന്നില്ലെന്നും ചില കളിക്കാർ ചൂണ്ടിക്കാണിക്കുന്നു.

“ഹെഡ് ഫിസിയോ കമലേഷ് ജെയിൻ, അവിടുത്തെ വിദഗ്ദ്ധർ എന്നിവരുടെ പ്രവർത്തനം ബിസിസിഐയുടെ കടുത്ത നിരീക്ഷണത്തിലാണ്. ടീമിൽ തുടർച്ചയായി ഉണ്ടാകുന്ന ഈ പരിക്കുകൾ ആശങ്കാജനകമാണ്, കാരണം ഒരു പൂർണ്ണ സജ്ജമായ പ്ലേയിംഗ് ഇലവൻ തിരഞ്ഞെടുക്കാൻ ക്യാപ്റ്റനും കോച്ചിനും സാധിക്കുന്നില്ല,” എന്ന് ഒരു വൃത്തത്തെ ഉദ്ധരിച്ച് ടൈംസ് ഓഫ് ഇന്ത്യ റിപ്പോർട്ട് ചെയ്തു.

“പ്രധാനപ്പെട്ട 15 അംഗ ടീമിനെ പോലും ഒന്നാം മുൻഗണനയിൽ തിരഞ്ഞെടുക്കാൻ കഴിയാത്ത സാഹചര്യത്തിൽ, മികച്ചൊരു പ്ലേയിംഗ് കോമ്പിനേഷനെക്കുറിച്ച് എങ്ങനെ ചിന്തിക്കാനാകും? ഓരോ സ്ഥാനത്തിനും വലിയ മത്സരമുള്ളതിനാൽ കളിക്കാർക്ക് സ്വന്തം ശരീരത്തെ കഠിനമായി സമ്മർദ്ദത്തിലാക്കേണ്ടി വരുന്നു,” ഉന്നത വൃത്തത്തെ ഉദ്ധരിച്ച് റിപ്പോർട്ടില്‍ പറയുന്നു.

ഈ സാഹചര്യത്തിൽ ഫിസിയോ കമലേഷ് ജെയിന്റെയും ടീം ഡോക്ടർ റിസ്‌വാൻ ഖാന്റെയും സ്ഥാനങ്ങൾ വലിയ തോതിൽ ചോദ്യം ചെയ്യപ്പെടുകയാണ്.