ഓൾഡ് ട്രാഫോർഡ് ക്രിക്കറ്റ് ഗ്രൗണ്ടിൽ വെച്ച് തിലക് വർമ്മയാണ് സൂര്യവംശിക്ക് അരങ്ങേറ്റ ക്യാപ്പ് സമ്മാനിച്ചത്. സീനിയർ ഓപ്പണർ സഞ്ജു സാംസണിന് പകരക്കാരനായി പ്ലെയിങ് ഇലവനിൽ ഇടംപിടിച്ച താരം അഭിഷേക് ശർമ്മയ്ക്കൊപ്പമാണ് ഇന്ത്യൻ ഇന്നിങ്സ് ഓപ്പൺ ചെയ്തത്. ഇതോടെ ഇന്ത്യൻ പുരുഷ ടീമിനായി കളിക്കുന്ന ചരിത്രത്തിലെ ആദ്യത്തെ 15 വയസ്സുകാരനായി സൂര്യവംശി മാറി.

1989-ൽ കറാച്ചിയിൽ പാകിസ്ഥാനെതിരായ ടെസ്റ്റ് മത്സരത്തിലൂടെ സച്ചിൻ അരങ്ങേറ്റം കുറിക്കുമ്പോൾ 16 വയസ്സും 205 ദിവസവുമായിരുന്നു അദ്ദേഹത്തിന്റെ പ്രായം.സൂര്യവംശിക്ക് ഇപ്പോൾ 15 വയസ്സും 99 ദിവസവും മാത്രമാണ് പ്രായം.ഇതിനുപുറമെ, അന്താരാഷ്ട്ര ക്രിക്കറ്റിൽ മൊത്തത്തിൽ ഏറ്റവും പ്രായം കുറഞ്ഞ ഇന്ത്യൻ താരമെന്ന റെക്കോർഡും സൂര്യവംശി സ്വന്തമാക്കി. 2019 സെപ്റ്റംബറിൽ അരങ്ങേറ്റം കുറിക്കുമ്പോൾ സൂര്യവംശിയേക്കാൾ ഏതാനും ദിവസങ്ങൾ മാത്രം പ്രായക്കൂടുതലുണ്ടായിരുന്ന ഷെഫാലി വർമ്മയുടെ പേരിലായിരുന്നു ഈ റെക്കോർഡ്.

അരങ്ങേറ്റത്തിൽ 10 പന്തിൽ നിന്ന് 2 സിക്സ് ഉൾപ്പെടെ 14 റൺസ് എടുത്ത് വൈഭവ് പുറത്തായി.ജോഫ്ര ആർച്ചർക്കും ജോഷ് ടങ്ങിനുമെതിരെ ഓരോ സിക്സറുകൾ വീതം പറത്തി താരം തന്റെ മികച്ച ബാറ്റിംഗ് മികവിന്റെ സൂചനകൾ നൽകിയെങ്കിലും, പാർട്ട് ടൈം ഓഫ് സ്പിന്നർ വിൽ ജാക്സിന് മുന്നിൽ സ്റ്റംപ് ഔട്ടാവുകയായിരുന്നു.